Administrata Federale e Aviacionit e Shteteve të Bashkuara (FAA) ka ndaluar fluturimet amerikane mbi hapësirën ajrore të Venezuelës, për shkak të rrezikut të lartë për sigurinë e fluturimeve si pasojë e sulmeve ushtarake në vend.
Vendimi është marrë në orët e para të mëngjesit, ndërsa FAA ka lëshuar katër Njoftime për Misionet Ajrore (NOTAM), që përfshijnë katër rajone të informacionit të fluturimeve në dhe përreth Venezuelës: San Juan, Piarco, Maiquetia dhe Curaçao.
Sipas autoriteteve amerikane, masa është parandaluese dhe synon mbrojtjen e aviacionit civil në një situatë të paqëndrueshme sigurie, ku aktiviteti ushtarak përbën rrezik serioz për fluturimet ajrore.
Ndërkohë, autoritetet venezueliane kanë raportuar se disa zona të kryeqytetit Karakas kanë mbetur pa energji elektrike pas shpërthimeve të ndodhura gjatë natës.
Qeveria e Venezuelës ka akuzuar Shtetet e Bashkuara për sulme ajrore ndaj Karakasit dhe shteteve Miranda, Aragua dhe La Guaira, ndërsa presidenti Nicolás Maduro ka shpallur gjendje të jashtëzakonshme në vend.
Situata vijon të jetë e tensionuar, me zhvillime të shpejta në planin ushtarak dhe diplomatik.
