Policia italiane ka çmontuar një bandë kriminale të njohur si “skifterët”, e përbërë nga katër shtetas shqiptarë, të cilët akuzohen për grabitje të mirëorganizuara në seri në banesa dhe biznese në provincën e Veronës.
Operacioni u finalizua më 23 dhjetor, pas një hetimi disa javor të nisur nga Seksioni i Krimeve kundër Pronës, si pasojë e rritjes së ndjeshme të vjedhjeve me thyerje gjatë muajve nëntor dhe dhjetor.
Modus operandi i bandës
Sipas autoriteteve italiane, grupi vepronte sipas një skeme të përsëritur dhe të strukturuar mirë, me role të ndara mes anëtarëve.
Dy prej tyre qëndronin në automjet për të monitoruar zonën dhe për të paralajmëruar rrezikun, ndërsa dy të tjerët vepronin në terren, të pajisur me mjete të posaçme për thyerje. Ata komunikonin vazhdimisht përmes radiove me dy drejtime.
Pasi identifikonin objektivin, ngjiteshin në ballkonet e kateve të sipërme, hapnin me forcë dritaret dhe hynin brenda banesave. Brenda pak minutash, përmbysnin ambientet në kërkim të bizhuterive, sendeve me vlerë dhe parave cash. Në disa raste, përdornin mjete profesionale për hapjen e kasafortave.
Çdo grabitje zgjaste nga 5 deri në 15 minuta, çka e bënte veprimtarinë e tyre të shpejtë dhe të vështirë për t’u kapur.
Si ranë në kurth
Më 19 dhjetor, banda kreu dy vjedhje radhazi në zona të ndryshme të Veronës, përfshirë një rast ku u grabit një kasafortë që përmbante bizhuteri ari dhe para në dorë. Pas këtyre episodeve, policia i ndoqi dhe i ndaloi gjatë kthimit të tyre në zonën e Gardës, ku po qëndronin përkohësisht.
Gjatë kontrollit të automjetit, u sekuestruan:
- një kasafortë e vjedhur,
- bizhuteri dhe para të gatshme,
- mjete profesionale për thyerje,
- një çelës fleksibël me disqe për hapje kasafortash,
- tre radio komunikimi.
Të arrestuar me precedentë penalë
Katër shqiptarët, të moshës 25–28 vjeç, rezultuan me precedentë penalë për krime kundër pronës, ndërsa dy prej tyre kishin dënime të mëparshme për vjedhje me thyerje banesash.
Bastisja e banesës ku qëndronin çoi në gjetjen e sasive të tjera të bizhuterive, parave dhe sendeve me vlerë, të dyshuara si të vjedhura në grabitje të mëparshme.
Hetimet vijojnë
Autoritetet italiane po hetojnë grupin edhe për grabitje të tjera të ngjashme, të raportuara në javët e fundit në Verona dhe zonat përreth.
Pas përfundimit të procedurave paraprake, katër të arrestuarit u dërguan në burgun “Montorio” të Veronës, ku do të qëndrojnë në dispozicion të Prokurorisë.
