Raportet më të fundit të inteligjencës amerikane paralajmërojnë se presidenti rus Vladimir Putin nuk ka hequr dorë nga ambicia për të pushtuar të gjithë Ukrainën dhe për të rimarrë territore në Europë që dikur i përkisnin ish-Bashkimit Sovjetik, edhe pse në prapaskenë po zhvillohen negociata për përfundimin e luftës.
Sipas disa burimeve të njohura me vlerësimet e shërbimeve amerikane të inteligjencës, ky qëndrim strategjik i Kremlinit ka mbetur i pandryshuar që nga nisja e pushtimit të plotë në vitin 2022. Këto vlerësime bien ndesh me deklaratat e fundit të zyrtarëve amerikanë që kanë sugjeruar se Moska mund të jetë e interesuar për paqe.
Zyrtarë dhe ligjvënës amerikanë theksojnë se bindja se Rusia synon më shumë territor është e përhapur edhe mes aleatëve europianë. Polonia dhe vendet baltike, sipas tyre, e shohin veten si objektiva të mundshëm të ardhshëm nëse ambiciet ruse nuk ndalen.
Aktualisht, Rusia kontrollon rreth 20 për qind të territorit të Ukrainës, përfshirë zona të mëdha në lindje dhe jug të vendit, si dhe Krimenë. Kremlini i konsideron këto territore si pjesë të Rusisë dhe ka refuzuar çdo kompromis domethënës në bisedimet për paqe.
Ndërkohë, Shtetet e Bashkuara, Ukraina dhe partnerët europianë po diskutojnë një plan që parashikon garanci sigurie për Kievin, përfshirë prani të forcave europiane, mbështetje të zgjeruar të inteligjencës dhe patrullime ajrore. Megjithatë, çështja e territoreve mbetet pika më e fortë e përplasjes, pasi Ukraina ka përjashtuar kategorikisht çdo dorëzim toke.
Zyrtarë amerikanë pranojnë se ende nuk është e qartë nëse Rusia është e gatshme për një marrëveshje reale paqeje, ndërsa vlerësimet e inteligjencës sugjerojnë se ambiciet e Kremlinit shkojnë përtej luftës aktuale, duke përbërë një kërcënim afatgjatë për sigurinë e Europës.
