Një mbrëmje e veçantë artistike kushtuar Lahutës është zhvilluar në kuadër të njohjes së saj nga UNESCO, duke shënuar një moment historik për trashëgiminë kulturore shqiptare. Aktiviteti u kthye në një festë emocionesh, krenarie dhe identiteti kombëtar, ku muzika, rrëfimet dhe tradita u bashkuan në një gjuhë të përbashkët: atë të rrënjëve tona.
Në një atmosferë solemne, mes tingujve karakteristikë të lahutës dhe pranisë së mjeshtërve artizanë e lahutarëve, u përcoll historia e një instrumenti që ka mbijetuar ndër shekuj, duke ruajtur kujtesën, epikën dhe shpirtin shqiptar. Performancat artistike dhe dëshmitë personale sollën në skenë jo vetëm muzikën, por edhe jetën dhe sakrificën e atyre që e kanë mbajtur gjallë këtë trashëgimi brez pas brezi.
Ministri i Kulturës u shpreh se kjo mbrëmje ishte më shumë se një aktivitet kulturor, ishte një dëshmi e gjallë e forcës së traditës shqiptare dhe e vlerësimit që ajo merr tashmë në rang botëror. Sipas tij, lahuta nuk është thjesht një instrument, por një simbol identiteti, historie dhe rezistence kulturore.
Ai theksoi se përfshirja e Lahutës në listën e trashëgimisë botërore të UNESCO-s është një arritje që i përket gjithë shqiptarëve dhe një dëshmi se kultura jonë ka vlera universale. Një trashëgimi që sot nuk flet vetëm për të shkuarën, por edhe për të ardhmen.
Mbrëmja u përmbyll mes duartrokitjesh dhe emocionesh, me një mesazh të qartë: Shqipëria është krenare për rrënjët e saj dhe e gatshme t’i ndajë ato me botën.
