TikTok ka hedhur një hap vendimtar për të siguruar të ardhmen e tij në Shtetet e Bashkuara. Pronari kinez i aplikacionit, ByteDance, ka nënshkruar një marrëveshje detyruese për shitjen e më shumë se 80% të aseteve të TikTok në SHBA, duke shmangur kështu një ndalim të plotë nga qeveria amerikane për arsye të sigurisë kombëtare.
Lajmi iu komunikua punonjësve ditën e enjte, 18 dhjetor 2025, nga vetë CEO i TikTok, Shou Zi Chew, i cili konfirmoi se ByteDance dhe TikTok kanë arritur një marrëveshje me tre investitorë të mëdhenj menaxhues: Oracle, Silver Lake dhe MGX. Së bashku, ata do të krijojnë një sipërmarrje të re të përbashkët në SHBA me emrin “TikTok USDS Joint Venture LLC”.
Sipas marrëveshjes, e cila pritet të finalizohet më 22 janar, përfundon një betejë disa-vjeçare mes TikTok dhe autoriteteve amerikane, të cilat kërkonin shkëputjen e kompanisë nga kontrolli kinez për shkak të shqetësimeve mbi sigurinë e të dhënave dhe ndikimin gjeopolitik.
Struktura e pronësisë së sipërmarrjes së re parashikon që:
- 50% e aksioneve të zotërohen nga një konsorcium investitorësh të rinj, ku Oracle, Silver Lake dhe MGX do të kenë nga 15% secila;
- 30.1% do të mbahen nga bashkëpunëtorë të disa investitorëve ekzistues të ByteDance;
- ndërsa ByteDance do të ruajë vetëm 19.9% të aksioneve, duke humbur kontrollin shumicë mbi operacionet në SHBA.
Kjo marrëveshje përfaqëson një pikë kthese historike për TikTok, i cili prej gushtit 2020, gjatë mandatit të parë të presidentit Donald Trump, ishte nën kërcënimin e ndalimit në SHBA. Përpjekjet për ta mbyllur aplikacionin kishin dështuar, ndërsa përdorimi i tij ishte rritur ndjeshëm.
Aktualisht, TikTok përdoret rregullisht nga më shumë se 170 milionë amerikanë, duke u kthyer në një nga platformat më me ndikim në rrjetet sociale, veçanërisht mes të rinjve.
📌 Me këtë marrëveshje, TikTok siguron mbijetesën në tregun amerikan, ndërsa Uashingtoni fiton kontroll më të madh mbi operacionet dhe të dhënat, duke mbyllur një nga kapitujt më të tensionuar të përplasjes teknologjike mes SHBA-së dhe Kinës.
