Përplasja mes opozitës dhe mazhorancës ka kaluar në një tjetër nivel tensioni. Kryetari i Grupit Parlamentar të Partisë Demokratike, Gazment Bardhi, ka reaguar ashpër ndaj deklaratave të Taulant Ballës, duke e cilësuar atë si “ushtar të Suel Çelës” dhe duke paralajmëruar se shumë shpejt edhe ai do të ulet në karrigen për heqjen e imunitetit.
Në një deklaratë për mediat, Bardhi tha se nuk ka interes të komentojë deklaratat e Ballës, por shtoi se drejtësia do të vijë edhe për të.
“Të komentoj deklaratat e ushtarit të Suel Çelës nuk ka interes për publikun. E siguroj Ballën që shumë shpejt edhe ai do të jetë në atë karrige”, deklaroi Bardhi.
“Ngre kartonë jeshil për çunat e Dubait”
Kreu i grupit parlamentar të PD akuzoi Ballën se mbron interesa kriminale dhe se përdor shumicën parlamentare për të votuar në favor të personave të lidhur me botën e krimit.
“Balla ngre kartonët jeshil për çunat e Dubait, sepse i ka bashkëpunëtorë”, u shpreh Bardhi.
Ai shtoi se Balla nuk ka asnjë autoritet moral për të folur për kaosin në Kuvend, ndërsa sipas tij, është vetë mazhoranca ajo që po përpiqet të mbulojë skandale të rënda korruptive.
Reagimi vjen pas deklaratave ironike të Ballës
Deklarata e Bardhit vjen pas fjalëve të Taulant Ballës, i cili ironizoi sjelljen e opozitës duke e krahasuar situatën e sotme në Kuvend me atë të tetë viteve më parë, gjatë zgjedhjes së Prokurores së Përgjithshme Arta Marku.
Balla deklaroi se sa herë protestat e opozitës nuk kanë “frymë”, demokratët përpiqen të krijojnë kaos në Kuvend.
“Asgjë e re nga fronti i lindjes. Sa herë protestat nuk kanë frymë, tentojnë t’i vënë zjarrin parlamentit”, tha Balla.
Klima politike në përshkallëzim
Përplasja e ashpër verbale mes Bardhit dhe Ballës vjen në një moment delikat politik, ku Kuvendi pritet të nisë procedurat për heqjen e imunitetit të zëvendëskryeministres Belinda Balluku, me kërkesë të SPAK.
Tensionet e sotme tregojnë se konflikti politik pritet të thellohet edhe më tej, ndërsa drejtësia dhe akuzat për lidhje me krimin po kthehen në armën kryesore të betejës parlamentare.
