Mbrëmja gala e organizuar nga Federata Shqiptare e Futbollit për ndarjen e çmimeve të “Topit të Artë” solli jo vetëm vlerësime individuale, por edhe disa pikëpyetje lidhur me procesin e votimit për çmimin “Lojtari i Vitit i Kombëtares”.
Ky çmim u vendos përmes votës së vetë futbollistëve të ekipit kombëtar, ndërsa në një video të shfaqur gjatë ceremonisë u panë lojtarët kuqezi teksa shprehnin preferencën e tyre për shokun më të spikatur të ekipit. Në fund të votimit, Berat Gjimshiti u shpall fitues, duke lënë pas Myrto Uzunin.
Megjithatë, ajo që ra më shumë në sy ishte mungesa e disa emrave të rëndësishëm në listën e votuesve. Për arsye që nuk u sqaruan, Ernest Muçi nuk rezulton të ketë marrë pjesë në votim apo të ketë shprehur votën e tij.
Po ashtu, mungon edhe Julian Shehu, një prej lojtarëve që u konsiderua si zbulimi i edicionit, falë paraqitjeve të tij bindëse gjatë kualifikueseve të Botërorit.
Në listën e futbollistëve që nuk votuan, pavarësisht se kanë qenë pjesë e rregullt e Kombëtares, figurojnë edhe emra si Marash Kumbulla, Taulant Seferi, Elhan Kastrati, si dhe Alen Sherri, ky i fundit i pranishëm edhe në sallë gjatë ceremonisë.
Mungesat kanë ngritur pikëpyetje mbi mënyrën e organizimit të votimit dhe kanë shtuar diskutimet rreth transparencës dhe përfshirjes së plotë të lojtarëve në një nga çmimet më prestigjioze individuale të Kombëtares.
