Kryetari i Partisë Demokratike, Sali Berisha, ka ngritur akuza të forta lidhur me dhënien e Portit të Vlorës, duke e cilësuar këtë çështje si një tjetër aferë të rëndë korruptive të lidhur drejtpërdrejt me kryeministrin Edi Rama.
Në deklaratën e tij për mediat, Berisha pretendoi se Porti i Vlorës i është dhënë për 60 milionë euro një personi që, sipas tij, rezulton të jetë magazinier pensionist i kompanisë “Salillari”. Ai theksoi se rasti është një shembull tipik i përdorimit të “prestanomeve”, ku emrat formalë shërbejnë për të fshehur përfituesit e vërtetë.
Duke folur për projektet e mëdha në qendër të Tiranës, Berisha u ndal edhe te ajo që e quajti “takimi i Arubës”, ku sipas tij janë vendosur pazare për ndërtimin e kullave shumëkatëshe, të cilat ai i cilësoi si “Everesti i Tiranës”. Sipas Berishës, biznesmenë të ndryshëm janë detyruar të zbatojnë kushte të vendosura nga qeveria, përfshirë zgjedhjen e ortakëve, studiot e projektimit dhe trajtimin e pronarëve që refuzonin marrëveshjet.
Ai deklaroi se në rast refuzimi nga pronarët e tokave, ndërhyrjen e merrnin grupe kriminale, ndërsa biznesmenët kishin vetëm rolin e zbatuesit të skemës.
Berisha akuzoi gjithashtu se edhe pas Bankës Dixhitale të Bitcoin-it fshihen emra offshore, ndërsa përfituesit realë, sipas tij, janë persona të lidhur ngushtë me pushtetin, duke përmendur Amant Josifin dhe Olsi Ramën.
“Është e kotë të merremi me emra formalë. Pas çdo vendimi qëndron firma e Edi Ramës”, deklaroi Berisha, duke shtuar se të gjitha këto projekte burojnë nga vendime qeveritare të miratuara drejtpërdrejt nga kryeministri.
Në përfundim, Berisha e cilësoi situatën si degradim të plotë të shtetit ligjor dhe e lidhur me atë që ai e quajti “Paketa e Maleve”, duke paralajmëruar se këto afera, sipas tij, do të jenë pjesë e betejës politike të opozitës në vijim.
