Partia Demokratike ka njoftuar zhvillimin e mbledhjes së Këshillit Kombëtar më 17 dhjetor, në orën 17:00, në kuadër të përgatitjeve politike dhe organizative për protestën e paralajmëruar të 22 dhjetorit.
Vendimi është marrë gjatë mbledhjes së Kryesisë së PD-së të zhvilluar një ditë më parë, ku diskutimet u përqendruan në situatën politike në vend, qëndrimet e opozitës dhe strategjinë për aksionin protestues të radhës.
Burime nga selia blu bëjnë me dije se në mbledhjen e Këshillit Kombëtar pritet të diskutohen:
- zhvillimet e fundit politike,
- vendimet e institucioneve të drejtësisë,
- roli i opozitës në raport me mazhorancën,
- si dhe organizimi i protestës së 22 dhjetorit.
Debate në Kryesi, Berisha mohon përçarjen
Mbledhja e Kryesisë së PD-së është shoqëruar me debate të forta, veçanërisht mes Flamur Nokës dhe Ervin Salianjit. Megjithatë, kryetari i Partisë Demokratike, Sali Berisha, ka mohuar çdo përçarje brenda forcës politike që ai drejton.
Në një reagim publik, Berisha deklaroi se Partia Demokratike mbetet e bashkuar në misionin e saj dhe akuzoi disa individë që, sipas tij, “bëjnë zhurmë në favor të qeverisë”.
“Mbledhja ishte jashtëzakonisht e rëndësishme dhe pozitive. Nuk ka përçarje. Ka disa të quajtur demokratë që pas zgjedhjeve u punësuan në administratë, të tjerë që flirtojnë me qeverinë për interesa personale. Por Partia Demokratike ka vetëm një kontratë: atë me qytetarët shqiptarë, për lirinë, demokracinë dhe rikthimin e votës së lirë”, u shpreh Berisha.
Ai shtoi se PD nuk do të qëndrojë për interesa individuale apo kontrata personale dhe e cilësoi këtë periudhë si “kohë misionarësh”, duke paralajmëruar intensifikim të aksionit opozitar në ditët në vijim.
Mbledhja e Këshillit Kombëtar pritet të shërbejë si një moment kyç për formalizimin e vendimeve politike dhe për mobilizimin e strukturave për protestën e 22 dhjetorit.
