Sekretari i Përgjithshëm i Partisë së Lirisë, Tedi Blushi, prezantoi paketën me 12 amendamente që PL kërkon të përfshihen në Buxhetin e vitit 2026, duke e cilësuar projektbuxhetin aktual të qeverisë si “antisocial” dhe që “thellon varfërinë”.
Gjatë fjalës së tij, Blushi tha se amendamentet synojnë rritjen e mbështetjes për kategoritë më të prekshme, si pensionistët, familjet në nevojë, sektorët e shëndetësisë, arsimit, bujqësisë dhe shkencës.
Fondi shtesë për Onkologjikun – 2.5 miliardë lekë për mungesën e ilaçeve
Një nga propozimet kryesore të PL-së është ndarja e një fondi shtesë prej 2.5 miliardë lekësh për trajtimin e mungesës kronike të ilaçeve në Onkologjik.
Blushi theksoi se situata në spital është “dramatike” dhe se shumë pacientë humbasin jetën vetëm sepse nuk sigurohen barnat jetike.
12 AMENDAMENTET E PARTISË SË LIRISË
1. Pensionet – +16.2 miliardë lekë
PL propozon një rritje reale të pensioneve, duke kundërshtuar rritjen aktuale që sipas Blushit llogaritet në vetëm 60 lekë në ditë në qytet dhe 20 lekë në ditë në fshat.
2. Bujqësia – +15 miliardë lekë
Sipas Blushit, sektori po përjeton një krizë të thellë dhe është i pambështetur, ndërsa fondet e IPARD pritet të mungojnë vitin e ardhshëm.
Rritja e propozuar synon të mbështesë fermerët dhe ekonomitë familjare.
3. Ndihma ekonomike, paaftësia dhe papunësia – +7.5 miliardë lekë
4. Shëndetësia – +7.5 miliardë lekë
Përfshirë këtu dhe fondin specifik për Onkologjikun.
5. Arsimi – +5.2 miliardë lekë
– Arsimi bazë: +2 miliardë lekë
– Arsimi i mesëm: +2 miliardë lekë
– Arsimi universitar: +1.2 miliardë lekë
6. Kërkimi shkencor – +2 miliardë lekë
7. Onkologjiku – +2.5 miliardë lekë për ilaçe
Blushi e quajti gjendjen e tanishme “krim kundër njerëzimit”.
8. Sporti – +1 miliard lekë
9. Siguria ushqimore – +0.75 miliardë lekë
10. Dosjet e sigurisë ushqimore – +0.5 miliardë lekë
Qëndrimi i PL: Buxheti i qeverisë favorizon korrupsionin
Gjatë deklaratës, Blushi akuzoi qeverinë se 70% e fondeve të buxhetit shkojnë te Ministria e Infrastrukturës për t’u “vjedhur”, dhe jo për shërbime cilësore ndaj qytetarëve.
Ai u ndal veçanërisht te situata e pensionistëve, të cilët sipas tij përballen me:
- rritje të çmimeve,
- faturat e larta të energjisë,
- shtrenjtimin e ilaçeve,
- pamundësinë për të përballuar kostot bazë të jetesës.
PL propozon rritjen e pensioneve me 6.8% që nga 1 janari 2026.
Fokus te bujqësia dhe ndihma për familjet në nevojë
Blushi theksoi se sektori i bujqësisë, ku punojnë 40% e shqiptarëve, është i braktisur nga qeveria, ndërsa mungesa e fondeve IPARD rëndon më tej situatën.
Ndihma ekonomike, personat me aftësi të kufizuar dhe të papunët – sipas PL – kanë nevojë urgjente për rritje të mbështetjes.
Konkluzioni
Blushi deklaroi se amendamentet do të shqyrtohen nen për nen në seancën plenare dhe se synimi i Partisë së Lirisë është të “zbusë koston e jetesës dhe të ndihmojë shtresat në nevojë, përballë një buxheti që i shërben vetëm korrupsionit”.
