Seanca e Komisionit të Ligjeve u ndez sot nga debatet mes deputetit të PD-së, Saimir Korreshi, dhe deputetes së PS-së, Zegjine Çaushi, lidhur me firmat për kandidatët në garën për Avokatin e Popullit. Replikat mes tyre u bënë nga më të ashpërit e ditës, duke krijuar një atmosferë tensioni dhe ironie.
Shkak u bë diskutimi mbi firmat e deputetëve që mbështesin kandidaturat. Në momentin që socialistja Çaushi ndërhyri, Korreshi iu përgjigj me tone ironike:
“Po deshe ti edhe një firmë, të rregullon byrazeri. Po deshe ndonjë firmë që të ka ngelur merak, edhe vulë.”
Replika e tij solli reagimin e menjëhershëm të deputetes së PS, e cila u kundërpërgjigj:
“Unë nuk kam nevojë as për firmë as për vulën tuaj, se fatin tim e kanë vendosur njerëz të tjerë. Ju kujtoheni në orën 12 të natës, shihni ndonjë ëndërr dhe vini këtu në mëngjes dhe i tërhiqni ato që keni bërë.”
Korreshi vijoi me ironi:
“Unë zakonisht ëndrrat i shoh me gjellë pasanikësh dhe ndonjë gjë tjetër, por jo me firma.”
Ndërkohë, anëtari tjetër i komisionit, Arjan Ndoja, ndërhyri duke e cilësuar tërheqjen e firmave si një veprim jo etik dhe jo moral, edhe pse juridikisht i lejuar:
“Nga ana morale kjo nuk është as burrërore, as etike. Por juridikisht bie mbështetja kur tërhiqet firma.”
Debati vjen në një moment ku gara për Avokatin e Popullit ka hyrë në fazën vendimtare, ndërsa tensionet politike në komision pritet të vijojnë edhe në seancat e ardhshme.
