Interi po shqyrton me seriozitet lëvizjet në krahun e djathtë të mbrojtjes, pasi Denzel Dumfris vazhdon të jetë i brishtë nga ana fizike dhe mbetet objektiv i disa klubeve të rëndësishme në Evropë. Kjo situatë ka shtyrë drejtuesit zikaltër të përgatisin një alternativë të besueshme për merkaton e janarit.
Emri që ka dalë më së shumti në skenë është ai i Marko Palestrës, mbrojtësit të talentuar të Atalantës, i cili këtë sezon po aktivizohet i huazuar te Kaljari. Shoku i Berat Gjimshitit te bergamaskët ka bërë paraqitje bindëse, duke tërhequr menjëherë vëmendjen e skautëve të Interit.
Profil që i përshtatet kërkesave të Interit
Palestra ka shkëlqyer sidomos në ndeshjet e fundit, përfshirë edhe sfidën kundër Juventusit, ku tregoi energji, agresivitet të kontrolluar dhe nivel të lartë taktiko-teknik. Ai shihet si një lojtar që mund të përshtatet lehtësisht në sistemin e Inzagit, veçanërisht nëse Dumfris mungon sërish ose largohet në verë.
Vendimi final pritet në prag të janarit
Drejtuesit zikaltër po monitorojnë situatën me kujdes dhe do të marrin një vendim përfundimtar me hapjen e merkatos. Palestra mbetet një nga pistat më konkrete, ndërsa Interi po kërkon të blindojë një repart që i ka shkaktuar jo pak shqetësime këtë sezon.
