Kryeministri izraelit Benjamin Netanyahu pritet të udhëtojë drejt Uashingtonit në fund të dhjetorit, për t’u takuar me presidentin amerikan Donald Trump. Sipas Radios Ushtarake të Izraelit, vizita është planifikuar të zhvillohet midis 28 dhe 31 dhjetorit, megjithëse datat zyrtare ende nuk janë konfirmuar. Zyra e kryeministrit izraelit nuk ka dhënë një reagim për momentin.
Takimi do të zhvillohet në një periudhë festive në Shtetet e Bashkuara, kur pjesa më e madhe e administratës amerikane është me pushime dhe Kongresi nuk është në seancë. Megjithatë, rëndësia e çështjeve që do të diskutohen e bën këtë vizitë të një peshe të veçantë politike dhe diplomatike.
Shtëpia e Bardhë konfirmoi se presidenti Trump e ka ftuar Netanyahun në një takim që do të jetë i pesti mes tyre që prej marrjes së detyrës nga kreu i Shtëpisë së Bardhë në janar 2025. Diskutimet pritet të fokusohen në dy çështje kryesore: marrëveshjen e sigurisë në zhvillim midis Izraelit dhe Sirisë, si dhe koordinimin për zbatimin e planit të paqes së administratës Trump për Gazën.
Ndërkohë, situata në Rripin e Gazës vijon të mbetet e tensionuar. Krahu ushtarak i Hamasit, Brigadat al-Qassam, njoftoi se do t’ia dorëzojë Izraelit trupin e një viktime pengjeje në orën 17:00 të ditës së sotme. Trupi u gjet gjatë një operacioni të përbashkët kërkimi me Brigadat al-Quds, krahun ushtarak të Xhihadit Islamik Palestinez, në zonën e Beit Lahiyas, në pjesën veriore të Rripit të Gazës.
Sipas mediave palestineze, përfshirë Quds News, janë publikuar edhe pamje ku persona të armatosur dhe të maskuar mbajnë një qese trupi, që pretendohet të jetë e viktimës.
Vizita e Netanyahut në Uashington pritet të zhvillohet në sfondin e këtyre zhvillimeve të ndërlikuara rajonale, teksa bisedimet me presidentin Trump synojnë të përcaktojnë hapat e mëtejshëm diplomatikë dhe të sigurisë në Lindjen e Mesme.
