Protestat e fermerëve në Greqi po marrin përmasa gjithnjë e më të mëdha, ndërsa ditën e sotme blegtorët e Larisës zhvilluan një akt simbolik të fortë duke derdhur qumësht në sheshin qendror të qytetit.
Prej disa ditësh, fermerët grekë protestojnë ndaj situatës së rënduar në sektorin bujqësor dhe blegtoral, ndërsa sot edhe blegtorët vendosën t’i bashkohen revoltës, të dëshpëruar nga përhapja e lisë që ka prekur delet dhe dhitë, duke shkaktuar humbje të mëdha ekonomike.
Protestë simbolike me qumësht, grurë dhe ushqime për kafshët
Mesditën e së martës (02/12), turma e blegtorëve u mblodh në sheshin kryesor të Larisës, ku derdhën:
- qumësht,
- grurë,
- misër,
- ushqime për kafshët,
përpara selisë së Policisë, si formë proteste ndaj krizës së madhe që, sipas tyre, ka goditur industrinë blegtorale.
Fermerët paralajmërojnë përshkallëzim të protestave
Blegtorët e Larisës thonë se gjendja është e papërballueshme dhe se ndihen të braktisur nga autoritetet. Ata kanë paralajmëruar se do të vijojnë protestat deri në marrjen e masave konkrete nga qeveria.
Ndërkohë, fermerët në gjithë Greqinë kanë paralajmëruar bllokimin e porteve dhe akseve kryesore rrugore, nëse kërkesat e tyre për mbështetje financiare dhe kompensim të dëmeve nuk plotësohen.
