Presidenti i Ukrainës, Volodymyr Zelensky, ka dhënë një deklaratë të fortë pas takimit të tij në Paris me presidentin francez, Emmanuel Macron, duke theksuar se bisedimet e fundit diplomatike janë të përqendruara tek mbyllja sa më shpejt e luftës, por vetëm mbi baza të qëndrueshme e të drejta për Ukrainën.
Zelensky, i cili nisi javën me një tjetër tur diplomatik europian, deklaroi se Kievi po punon intensivisht për të gjetur mekanizmat që mund të garantojnë një armëpushim të qëndrueshëm dhe një paqe afatgjatë, duke nënvizuar rolin kyç të aleatëve perëndimorë në këtë proces.
“Lufta duhet të përfundojë sa më shpejt të jetë e mundur. Tani shumë gjëra varen nga pjesëmarrja e secilit udhëheqës. Sot do të flasim edhe me udhëheqës të tjerë”, shkroi Zelensky në platformën X, duke lënë të kuptohet se negociatat po hyjnë në një fazë delikate.
Vizita në Paris vjen vetëm një ditë pas bisedimeve të zhvilluara në Florida midis delegacioneve amerikane dhe ukrainase, të cilat, sipas të dyja palëve, kanë qenë produktive dhe kanë shënuar një hap përpara në harmonizimin e pozicioneve mbi të ardhmen e konfliktit.
Shefja e politikës së jashtme të BE-së, Kaja Kallas, tha se “kjo mund të jetë një javë vendimtare”, duke theksuar se vullneti i fuqive perëndimore do të jetë thelbësor për të çuar përpara një marrëveshje që garanton integritetin territorial të Ukrainës.
Në anën tjetër, ndërsa diplomacia ukrainase dhe ajo perëndimore intensifikojnë përpjekjet, Uashingtoni po mban kontakte të drejtpërdrejta edhe me Moskën. I dërguari i posaçëm amerikan, Steve Witkoff, pritet të takohet të martën me presidentin rus Vladimir Putin — takimi i tyre i gjashtë që nga janari — duke shtuar peshën e bisedimeve për një rrugë të mundshme drejt paqes.
Ndërkohë, Zelensky e bëri të qartë se çdo zgjidhje debe të ketë në thelb sigurinë, sovranitetin dhe paqen e qëndrueshme për popullin ukrainas, duke ripërsëritur se çdo marrëveshje duhet të respektojë parimet ndërkombëtare dhe të garantojë që agresioni i Rusisë të mos përsëritet.
