Nga viti në vit, Shqipëria po shënon rritje të ndjeshme të vizitorëve të huaj. Nën këtë zhvillim pozitiv, pjesën më të madhe e përbën turizmi bregdetar, falë bukurive natyrore të Adriatikut e Jonit dhe rritjes së infrastrukturës hoteliere.
Por për një destinacion që synon të bëhet konkurrues në tregun ndërkombëtar, vetëm deti nuk mjafton. Turizmi bregdetar, i ndikuar edhe nga sezonaliteti, nuk mund të jetë i vetmi atraksion që ofron vendi ynë. Për të siguruar një përvojë më të pasur, për të tërhequr turistë të huaj gjatë gjithë vitit dhe për të krijuar një arsye reale për rikthimin e tyre, Shqipëria ka nevojë për një zhvillim të qëndrueshëm dhe të mirëmenaxhuar të turizmit kulturor.
Ky lloj turizmi, që bazohet në trashëgiminë historike dhe arkeologjike të vendit, përbën një aset të jashtëzakonshëm që nuk është shfrytëzuar ende në potencialin e tij të plotë. Turistët kërkojnë më shumë: Përjetime autentike, njohje me kulturën vendase dhe mbi të gjitha, histori.
Në këtë pikë, Durrësi ka një avantazh unik – një qytet me histori mijëravjeçare, që nga periudha ilire, romake, bizantine, osmane, e deri në kohët moderne. Megjithatë, përkundër kësaj pasurie të jashtëzakonshme, oferta kulturore që u ofrohet vizitorëve sot në Durrës mbetet zhgënjyese dhe larg standardeve minimale të turizmit kulturor.
