Partia Demokratike ka paralajmëruar një padi në SPAK në lidhje me atë që e konsideroi si një “puç kushtetuese”, në lidhje me bisedat e publikuara në media ku kryetarja e komisionit të Ligjeve Klotilda Bushka bën “pazar” me ish-kryetaren e KLGj-së Naureda Llagamin, duke i ofruar mbështetje kësaj të fundit për ta emëruar në Gjykatën Kushtetuese.
Në një deklaratë për mediat nga selia blu, Belind Këlliçi deklaroi se të përfshirë në këtë “puç kushtetuese” janë edhe kryetari i Gjykatës së Lartë dhe njëkohësisht kreu i Këshillit të Emërimeve në Drejtësi, Sokol Sadushi, si dhe presidenti Bajram Begaj.
Sipas Këlliçit, në këtë “puç kushtetuese”, nuk ishte synimi për një, por për lirimin e tre vendeve në Gjykatën Kushtetuese, ku përmendi Elsa Toskën, e cila dha dorëheqjen dhe tentativat për t’i ndërprerë mandatin Holta Zaçajt dhe Sonila Bejtjas.
Këlliçi deklaroi se nga bisedat kuptohet se Klotilda Bushka kërkon tre vende në Kushtetuese për të sistemuar të mbeturit jashtë liste të komisionit të Vetingut.
