Pavarësisht nga premtimet e mëdha të bëra nga kjo maxhorancë që kur erdhi në pushtet në vitin 2013, se arsimin do ta kishte prioritet të prioriteteve dhe do të investonte për arsimin 5 % të PPB, faktet dhe statistikat tregojnë se qeveria nuk arriti as pas 12 vitesh të përmbushë as gjysmën e këtij premtimi.
Konkretisht, qeveria planifikon në buxhetin e vitit 2025 për arsimin në tërësi, përfshirë edhe arsimin profesional, vetëm 2,45 % të PPB të vendit, ku për arsimi parauniversitar të përgjithshëm planifikohet vetëm 1,79 % e PPB, për arsimin profesional planifkohet vetëm 0,17 % e PPB dhe për arsimin e lartë planifikohet vetëm 0,49% e PPB.
Ndërsa për të gjorën shkencë qeveria planifikon në këtë buxhet vetëm 0,06 % të PPB, edhe pse u bë një propagandë aq e madhe me një ligj të ri, i cili u miratua vetem me votat e PS pikërisht në seancat kur gjysma e deputetëve të opozitës e kishin paradoksalisht të ndaluar të marrin pjesë në të gjithë veprimtaritë e Kuvendit, si në komisione ashtu edhe në seancat plenare.
Me këtë nivel të investimit vendi ynë mbetet i fundit për nga investimi në arsim edhe në Rajonin e Ballkanit (në vitin 2023: Kosova dhe Maqedonia e Veriut afërsisht 4% të PPB, ndërsa Slovenia, Kroacia dhe Serbia 4,5 % të PPB dhe më e lartë). Por kjo nuk është as cështje krahasimi me vendet e tjera dhe as cështje thjesht statistikash. Ajo që është e rëndësishme të vlerësohet, ështësa i përgjigjet ky buxhet, pra ky nivel investimi, nevojave për një arsim cilësor për cdo fëmijë e të re/ri në cdo fshat dhe qytet të vendit tonë.
