Prej pak ditësh, ideja për të pasur një shtet bektashi sipas modelit të Vatikanit ka trullosur opinionin në vend. Pasi kryeministri Edi Rama e shpalosi planin e tij në një prononcim për New York Times dhe e përforcoi më pas në fjalimin e tij në OKB, kanë nisur edhe teoritë konspirative. Një pjesë thonë se Ramës i duhet sheshi në qendër të Tiranës, ku qëndron një teqe, për të ngritur aty kullën e radhës. Një pjesë thonë se propozimi fsheh qëllimin për të sjellë myslimanët e dëbuar nga Gaza dhe propozimi i ka ardhur nga Izraeli. Një pjesë shohin një lëvizje që i paraprin propozimit të Vuçiçit për një shtet të vogël ortodoks në veri të Kosovës. Mediat turke raportonin konspiracione me Xhorxh Soros, djali i të cilit ka lidhje të ngushta me Ramën. Gjithsesi, për momentin mbetet ende një shashkë propagandistike, pasi edhe sikur ëndrra e kryeministrit të realizohet, ajo do shumë vite të implementohet dhe një buxhet shumë të madh investimi, të cilin Rama as në 100 vite pushtet nuk e mbledh dot. Ky kryeministër nuk ngriti dot pensionet, pasi u tall me këtë shtresë me 4 mijë lekë indeksim, flet për krijimin e një mini-shteti që do investim marramendës, përveç pjesës së ndryshimit të Kushtetutës, si edhe lobimit që ndërkombëtarët ta njohin, njësoj si Vatikanin. Kjo nuk është e vetmja marrëzi e këtij kryeministri. Gazeta do të rendisë disa çmenduri të tjera të Ramës të cilat vazhdojnë të shtohen nga viti në vit. Mjaftojnë të shihen nga distanca e sotme për të kuptuar se si është shfryrë e gjithë kjo tullumbace e propagandës së Ramës dhe vartësve të tij në qeveri dhe media.
Marrëzitë e kryeministrit
Rama para pak kohësh hodhi në treg një tjetër shashkë. Mediat pranë tij zbuluan se kryeministri mund të bëhej sekretar i NATO. Madje dhe vetë kreu i qeverisë kur u pyet për këto lajme, nuk i mohoi zërat se po lobohej fort për emrin e tij që ai të merrte drejtimin e Aleancës. Të gjithë e dimë historinë e kësaj ëndrre të kryeministrit. Rama për të krijuar idenë një lideri global, gjithmonë ka tentuar të marrë pa sukses vëmendjen në disa kriza të mëdha në rajon dhe botë. Për shumë njerëz këtu në Shqipëri, në atë moment i duket sikur lideri shqiptar është i përzgjedhuri dhe atë e respektojnë të gjithë ndërkombëtarët, por koha ka treguar se e gjithë kjo është bërë për interesa momentale dhe personale. Po e nisim nga përplasja e fundit e Serbisë dhe Kosovës për Veriun. Edi Rama lajmëroi para disa muajsh se kishte vënë “botën perëndimore” në lëvizje, si SHBA-në, Gjermaninë dhe Francën, duke iu dorëzuar një draft për zgjidhjen e konfliktit Kosovë-Serbi. Natyrisht, kuptohet që askush nuk ia ka kërkuar Edi Ramës këtë nder, pasi këtë fakt e konfirmuan dhe liderët e Beogradit dhe Prishtinës. Por ajo që është më e rëndësishme është se këtë herë, kreu i qeverisë shqiptare doli përfundimisht jashtë loje. Draftin e tij nuk e përfilli njeri. Çfarë do lloj plani që kishte planifikuar kryeministri nuk u realizua. Madje të vetmen gjë që arriti ishte që kosovarët të krijojnë një urrejtje të panevojshme ndaj vendin tonë dhe e gjitha për shkak të qëndrimeve të liderit tonë global.
“Ballkani i Hapur”
Për të marrë vëmendje, Edi Rama gjithmonë në kancelaritë perëndimore ka bërë zëdhënësin e Serbisë. Kur Brukseli i kërkoi Serbisë t’i bashkohej sanksioneve kundër Rusisë, Vuçiç gjeti te Rama një aleat që i kërkonte mirëkuptim Bashkimit Europian për dualitetin e qeverisë serbe. Situata me pengmarrjen e tre policëve ishte rasti kur Vuçiç mund t’ia shlyente favorin Edi Ramës. Nëse do ta pranonte mikun e tij shqiptar si negociator të krizës jo vetëm do të mbante gjallë egon e Ramës për të bërë politikë përtej kufijve të Shqipërisë, por në fund të fundit, do të tregonte se Ballkani i Hapur e kishte një shans. Ndodhi e kundërta. Presidenti serb i mbajti në burg tre policët e Kosovës edhe pas telefonatave të Edi Ramës. Vuçiç priti telefonatën nga Sekretari i Shtetit, Blinken pastaj liroi tre policët. Ballkani i Hapur dështoi. Ky projekt që linte jashtë Kosovën, i trumbetuar gati në çdo dalje të Ramës për mediat, ka disa muaj që nuk përmendet më. Në atë kohë thuhej si nga politika serbe, por edhe shqiptare se presidenti serb dhe kryeministrat shqiptarë dhe maqedonas verior Zoran Zaev dhe Edi Rama meritojnë Çmimin Nobel për Paqe për gjithë këtë nismë që kanë marrë. Por të gjitha këto rezultuan vetëm fjalë dhe propagandë. Marrëveshjet dhe fitimet te mëdha që do të përfitonte Shqipëria nga Ballkani i Hapur, sipas Edi Ramës u zhdukën.
