Kryeministri Edi Rama nga Praga ka komentuar dje marrëveshjen me Italinë për emigrantët, ndërsa mori pjesë në forumin “GLOBSEC 2024”. Nga Praga, Çeki, Rama theksoi se Shqipërisë i takon që të jetë e dobishme për miqtë, ndërsa një koment e pati edhe për debatet e krijuara të BE mbi këtë marrëveshje. Rama u shpreh se debatet tregojnë se Europa nuk është e gati të veprojë si një e vetme. “Mua më takon të jem i dobishëm për miqtë dhe për Shqipërinë që ajo të jetë e dobishme për miqtë. Nëse miqtë kërkoj diçka duhet të jesh pranë tyre, jo doemos duhet të biesh dakord 100%. Ne kemi shkuar në luftëra së bashku, ne erdhëm me ju dhe nuk e vumë në dyshim. Thënë kjo, marrëveshja në fjalë është për një temë që është kaq e madhe, kaq e rëndësishme, kaq përcaktuese për Europën dhe mënyrën se si ajo duhet të shohë veten dhe të ardhmen e saj. Po flas për emigracionin dhe ta transformosh atë në një zënkë mes të majtës dhe djathtës, në një konflikt brenda Europës, tregon se ndërkohë që ky është një problem i të gjithë Europës, Europa nuk është e gati të veprojë si një e vetme dhe në vend që të trajtojmë problemin është më e lehtë ta ndërtojmë jetën e përditshme bazuar në politika partiake që nuk na çojën askund”, deklaroi Rama. Ndwrkohw kryeministri Edi Rama tërheq gjithnjë vëmendje për stilin dhe veshjen.
Nuk kishte si të ndodhte ndryshe, edhe dje në Pragë kreu i qeverisë u komplimentua për atletet e bardha që kishte veshur. Moderatori Steve Clemons i tha Ramës se është xheloz për këpucët e tij, pasi ka lëvizur nga një skenë e forumit “GLOBSEC 2024” në një tjetër me këpucë të parehatshme. Ndërkohë, Rama i sugjeroi që t’i blejë të njëjtat ndërsa i tha se janë edhe të lira. “I thashë jam shumë xheloz për këpucët se kam ecur nga një skenë në tjetrën sot me këto këpucë të parehatshme”, tha ai, ndërsa Rama u përgjigj: “janë të lira, mund t’i blesh dhe ti”.
