Autoritetet venezueliane kanë sekuestruar një sasi rekord prej 6.8 ton lëndë narkotike, duke i dhënë një goditje të fortë rrjeteve ndërkombëtare të trafikut të drogës. Operacioni, i zhvilluar në disa zona të vendit, çoi në arrestimin e gjashtë personave të përfshirë në aktivitetin kriminal.
Sipas Ministrisë së Brendshme, ngarkesa përbëhej nga mijëra pako me marijuanë dhe kokainë, të shpërndara në disa dërgesa të ndara. Vetëm njëra prej tyre përfshinte mbi 14 mijë pako droge, të destinuara për trafik ndërkombëtar.
Operacionet u shtrinë kryesisht në rajonin e Zulias, ku u ndaluan disa persona të kapur në flagrancë me dhjetëra kilogramë marijuanë. Hetimet paraprake kanë zbuluar se të dyja rastet janë të lidhura me një rrjet kriminal të strukturuar, që sipas autoriteteve ka lidhje direkte me mafien shqiptare që operon nga territori i Ekuadorit.
Ministri i Brendshëm deklaroi se lufta kundër trafikut të drogës është reale dhe e pandalshme, duke theksuar se bllokimi i rrugëve detare dhe ajrore ka detyruar grupet kriminale të përdorin itinerare tokësore, ku ekspozohen më lehtë ndaj forcave të sigurisë.
Në total, u sekuestruan mbi 6,850 kilogramë substanca narkotike, ku pjesa dërrmuese ishte marijuanë, ndërsa një sasi më e vogël kokainë. Autoritetet e cilësuan operacionin si një goditje të rëndë ndaj strukturës logjistike të krimit të organizuar.
“Kjo tregon qartë se territori ynë nuk është dhe nuk do të jetë korridor i lirë për trafikun e drogës. Çdo pako e sekuestruar është një pengesë më shumë për mafien”, deklaroi ministri, duke paralajmëruar operacione të tjera në vijim.
