Gazetarja Klodiana Lala ka deklaruar se zbardhja e plotë e ngjarjes së 21 janarit mund të vijë vetëm përmes dy rrugëve konkrete. Sipas saj, hetimet e SPAK kanë mbetur aktualisht në pritje të disa akteve ekspertimi, çka ka ngadalësuar procesin, ndërsa dosja e trashëguar nga e kaluara është e dëmtuar rëndë.
Lala thekson se mënyra e parë për të arritur te e vërteta është marrja e statusit të të penduarit nga deputeti Agron Malaj, i cili ka qenë komandant i grupit të zjarrit dhe, sipas saj, e di saktësisht se kush ka dhënë urdhrin për të qëlluar mbi protestuesit.
Mënyra e dytë, sipas gazetares, është zbardhja e plotë e komunikimeve në radiot e Gardës së Republikës, pasi deri më sot janë publikuar vetëm fragmente që nuk tregojnë të gjithë zinxhirin e urdhrave.
Ajo shprehet skeptike se politika ka pasur vullnet real për ta zbardhur ngjarjen ndër vite, duke kujtuar shkatërrimin e provave, prishjen e serverëve dhe kohën e gjatë të humbur. Sipas Lalës, edhe nëse identifikohet arma apo plumbi fatal, pa urdhrin zinxhir, drejtësia do të mbetet vetëm te ekzekutori dhe jo te përgjegjësit realë.
