Prokuroria e Posaçme (SPAK) ka zgjeruar hetimet ndaj zyrtares së lartë Belinda Balluku, ndërsa Gjykata e Posaçme kundër Korrupsionit dhe Krimit të Organizuar ka vendosur sekuestron preventive të një vile në zonën e Gjilekës, në Dhërmi.
Sipas dokumenteve të cituara në procedimin penal nr. 136 të vitit 2025, pasuria e sekuestruar është një vilë dykatëshe, për të cilën hetuesit dyshojnë se mund të lidhet me veprat penale të korrupsionit dhe pastrimit të produkteve të veprës penale.
Burime nga hetimi bëjnë me dije se SPAK po verifikon mënyrën e përfitimit të pronës dhe transaksionet financiare që lidhen me të. Sipas dyshimeve të ngritura nga prokuroria, prona mund të jetë përfituar në këmbim të favorizimeve në procedura tenderuese gjatë kohës kur Balluku ushtronte funksione drejtuese në institucionet shtetërore.
Në dosjen hetimore përmenden edhe persona të tjerë, të cilët dyshohet se janë përdorur për të fshehur pronësinë reale të pasurisë përmes kontratave dhe marrëveshjeve të ndryshme.
SPAK thekson se hetimet janë ende në vijim dhe se po mblidhen prova shtesë për të dokumentuar plotësisht rrethanat e çështjes. Ndërkohë, sekuestrimi i pasurisë është një masë preventive dhe nuk përbën vendim përfundimtar mbi fajësinë e personave të përfshirë.
Autoritetet pritet të vijojnë verifikimet për identifikimin e çdo personi që mund të ketë pasur rol në këtë çështje, ndërsa procesi hetimor mbetet i hapur.
