Ekzekutimi i biznesmenit Mondi Mëhalla (Edmond Hyka) mbrëmjen e 30 nëntorit në Elbasan po merr formë të qartë, pas arrestimeve, shpalljes në kërkim të autorëve dhe analizës së pamjeve filmike që dokumentuan lëvizjet e killerave para dhe pas krimit. Burime hetimore pohojnë se pista kryesore lidhet me një ortakëri të prishur mes viktimës dhe bashkëpunëtorit të tij në biznes, Xhino Ago, tashmë i arrestuar.
Ortakëria që u kthye në konflikt
Hetuesit thonë se midis Mëhallës dhe 32-vjeçarit Ago ka pasur mosmarrëveshje të forta për ndarjen e fitimeve në biznesin e përbashkët, përfshirë karburantin “Xhaxhi Oil”, pranë të cilit u ekzekutua viktima. Konfliktet mes tyre janë dokumentuar edhe kohët e fundit, dhe dyshohet se ato janë përshkallëzuar deri në planifikimin e atentatit.
Makina e krimit – pronë e ortakut
Një detaj i rëndësishëm i zbuluar nga Policia tregon se automjeti tip Audi, i përdorur nga autorët për t’u larguar dhe më pas i gjetur i djegur, rezulton në pronësi të vetë Xhino Agos. Ai ia kishte dhënë “për përdorim” një prej të dyshuarve si killerë, Marselo Arani, i cili ishte në masën “arrest shtëpie” për një çështje tjetër.
Gjithashtu, policia ka sekuestruar edhe armën e krimit, e cila u përdor për të qëlluar Mëhallën me dy plumba në kokë, duke e lënë të vdekur brenda makinës së tij Range Rover.
Çfarë filmuan kamerat e sigurisë
Pamjet e kamerave të bizneseve dhe rrugëve përreth kanë luajtur rol kyç në zbardhjen e mekanizmit të vrasjes. Sipas burimeve policore:
- Killerat kanë ndjekur lëvizjet e Mëhallës përpara atentatit.
- Ata kanë ndaluar automjetin pak metra larg karburantit, duke pritur momentin kur viktima do të hipte në makinë.
- Sapo 43-vjeçari u ul brenda Range Rover-it, njëri nga autorët iu afrua dhe e qëlloi nga afërsia.
- Më pas killerat janë larguar me shpejtësi, duke ndërruar rrugë disa herë për t’i shmangur kamerat, deri sa kanë braktisur dhe djegur automjetin.
Pamjet janë shfrytëzuar për të rindërtuar itinerarin e autorëve dhe për të lidhur bashkëpunëtorët në këtë ngjarje.
Arrestimet dhe personat në kërkim
Në kuadër të operacionit policor “Strike”, policia dhe prokuroria kanë bërë të mundur:
Në pranga
- Xhino Ago, 32 vjeç – i dyshuar si bashkëpunëtor kryesor; akuzohet për “Vrasje me paramendim” dhe armëmbajtje pa leje.
- Kujtim Pisha, 52 vjeç – roja i karburantit, arrestuar për “Moskallëzim krimi”, pasi dyshohet se ka parë lëvizjet e autorëve, por nuk ka raportuar asgjë.
Të shpallur në kërkim
- Marselo Arani, 32 vjeç – dyshohet si një nga ekzekutorët; në momentin e ngjarjes duhej të ishte në “arrest shtëpie”.
- Armando Kola, 35 vjeç – bashkëpunëtor i Aranit dhe një nga autorët e dyshuar.
Të dy dyshohen për vrasje me paramendim dhe armëmbajtje pa leje.
Hetimet vijojnë
Prokuroria dhe Policia po punojnë për të identifikuar të tjerë persona që mund të kenë ndihmuar në organizimin e atentatit, ndërkohë që po analizohen prova të reja, përfshirë të dhënat e celularëve dhe DVR-ve të sekuestruara.
