Detaje të reja janë zbardhur mbi incidentin me armë që ndodhi gjatë një eventi të rëndësishëm në Washington DC, ku i pranishëm ishte edhe presidenti amerikan Donald Trump.
Sipas mediave amerikane, autori i dyshuar është identifikuar si 31-vjeçari Cole Thomas Allen, i cili është parë duke vrapuar drejt sallës ku po zhvillohej eventi, përpara se të neutralizohej nga forcat e sigurisë.
Autoritetet bëjnë me dije se i dyshuari ndodhet aktualisht në një spital lokal, nën mbikëqyrjen e policisë, ku po merr trajtim mjekësor.
Prokurori i Përgjithshëm i SHBA, Todd Blanche, deklaroi se ndaj tij pritet të ngrihen akuza shumë shpejt.
Ndërkohë, shefi i përkohshëm i Departamentit të Policisë Metropolitane, Jeffery W. Carroll, konfirmoi se i dyshuari ishte i armatosur rëndë:
- një pushkë gjahu
- një pistoletë
- disa thika
Gjatë ndërhyrjes së United States Secret Service, një agjent mbeti i plagosur, por ndodhet jashtë rrezikut për jetën dhe në gjendje të mirë shëndetësore.
Hetimet vijojnë për të zbardhur motivet e sulmit, ndërsa autoritetet po analizojnë nëse bëhet fjalë për një akt të izoluar apo për një kërcënim më të gjerë ndaj sigurisë.
