Wes Streeting ka dhënë dorëheqjen nga qeveria britanike, duke deklaruar se ka humbur besimin në udhëheqjen e kryeministrit Keir Starmer.
Në një letër të publikuar në platformën X, Streeting kritikoi ashpër Starmerin dhe kërkoi nisjen e një procesi të ri drejtimi brenda Partia Laburiste.
“Tani është e qartë se ju nuk do ta udhëhiqni Partinë Laburiste në zgjedhjet e ardhshme të përgjithshme”, shkroi Streeting në letrën e tij drejtuar kryeministrit britanik.
Ai theksoi se deputetët dhe sindikatat laburiste kërkojnë një debat të hapur për të ardhmen e partisë dhe jo përplasje personale apo taktika politike.
“Deputetët dhe sindikatat laburiste duan që debati nesër të jetë një betejë idesh, jo antagonizmash personale apo taktikash të vogla partiake”, u shpreh ai.
Streeting kërkoi gjithashtu një proces të gjerë dhe gjithëpërfshirës për zgjedhjen e drejtimit të ri të partisë.
“Procesi duhet të jetë gjithëpërfshirës dhe të përfshijë kandidatët më të mirë të mundshëm. Unë e mbështes këtë qasje dhe shpresoj se ju do ta lehtësoni atë”, deklaroi ish-ministri.
Wes Streeting mbante postin e Sekretarit të Shëndetësisë që prej vitit 2024 dhe konsiderohej një nga figurat më të rëndësishme të krahut qendror të laburistëve.
Ai u zgjodh për herë të parë deputet në vitin 2015 dhe më herët kishte shërbyer si president i Unionit Kombëtar të Studentëve dhe këshilltar lokal në Londër.
Sipas mediave britanike, Streeting zhvilloi një takim të shkurtër me Starmer vetëm pak orë para fjalimit tradicional të Charles III në Parlament, ku prezantohet programi legjislativ i qeverisë.
