Vokshi nga Bukureshti: PD denoncoi shtetin antidemokratik të Ramës, PPE mbështet kauzën tonë për zgjedhje të lira

Deputetja e Rithemelimit, Albana Vokshi ka marrë pjesëmarrëse në Kongresin e Partisë Popullore Europiane në Bukuresht, ku ka denoncuar shtetin antidemokratik të Edi Ramës. Me anë të një postimi në rrjetin social deputetja Albana Vokshi, thekson se për PD e Rithemelimit është shumë i rëndësishëm qëndrimi i PPE-së se vendit i duhet zbatim i shpejtë i rekomandimeve të OSBE/ODIHR-it për reformën zgjedhore. “Në Kongresin e Partisë Popullore Europiane ia dolëm të denoncojmë shtetin antidemokratik të Edi Ramës dhe të marrim mbështetje për kauzën tonë të zgjedhjeve të lira e të ndershme. Si e vetmja përfaqësuese e Partisë Demokratike të Shqipërisë, pata rastin të njoh partitë simotra, si dhe drejtues të lartë të institucioneve në Bashkimin Europian, për shkeljen e rëndë të të drejtave politike në Shqipëri. Në një rezolutë të posaçme, Kongresi i Partisë Popullore Europiane, duke marrë shkas nga rasti flagrant i pengimit të zotit Beleri për të bërë betimin si kryebashkiak i zgjedhur, thekson se “mosrespektimi flagrant i qeverisë shqiptare për shtetin e së drejtës krijon një hendek politik midis Shqipërisë dhe BE-së”. Rezoluta e miratuar nga PPE konfirmon shqetësimin e Partisë Demokratike se mosrespektimi i shtetit të së drejtës, të drejtave themelore dhe lirisë së medias, si dhe korrupsioni i përhapur dhe mungesa e ndarjes së pushteteve, po minojnë rrugën e anëtarësimit të Shqipërisë në BE. Partia Popullore Europiane, formacioni më i madh politik në Bashkimin Europian bën thirrje për zbatimin e shpejtë të të drejtave parlamentare dhe kushtetuese të opozitës, duke përfshirë funksionin e saj themelor për të mbajtur ekzekutivin përgjegjës. Kjo do të thotë se opozitës nuk mund t’i hiqet e drejta as për t’u përfaqësuar siç duhet në Komisionin e Reformës Zgjedhore, as për të ngritur komisionet hetimore parlamentare. Partia Popullore Europiane, përmes rezolutës për gjendjen në Shqipëri, shpreh shqetësimin për blerjen e votave dhe përdorimin e shtetit në zgjedhje. Për PD është shumë i rëndësishëm qëndrimi i PPE-së se vendit i duhet “zbatim i shpejtë i rekomandimeve të OSBE/ODIHR-it për reformën zgjedhore dhe një dialog politik konstruktiv dhe gjithëpërfshirës nga të gjitha palët për të adresuar këtë çështje përpara zgjedhjeve të ardhshme të përgjithshme”, shkroi dje Vokshi.