Në Uashington zhvillohet sot takimi i parë i Bordit të Paqes, një nismë e krijuar nga presidenti amerikan Donald Trump, me fokus rindërtimin dhe stabilizimin e Gazës.
Në këtë mbledhje merr pjesë edhe Shqipëria, e përfaqësuar nga kryeministri Edi Rama, i cili do të firmosë marrëveshjen e anëtarësimit të vendit si anëtar themelues i Bordit. Kosova përfaqësohet nga presidentja Vjosa Osmani.
5 miliardë dollarë të premtuara për Gazën
Shtetet pjesëmarrëse kanë ofruar në këtë fazë rreth 5 miliardë dollarë për rindërtimin e Gazës, ndërkohë që vlerësimet e United Nations, Bankës Botërore dhe European Union e çojnë koston totale të rindërtimit në rreth 70 miliardë dollarë, pas më shumë se dy vitesh lufte.
Nuk është bërë e ditur nëse Shqipëria ka kontribuar financiarisht, ndërsa deri tani nuk ka detyrime të përcaktuara financiare për vendin tonë. Sipas statutit, Shqipëria do të ketë mandat 3-vjeçar në Bord.
Forcë ndërkombëtare stabilizimi
Sipas planit të miratuar nga Këshilli i Sigurimit i OKB-së, vendet anëtare do të kontribuojnë me trupa për një Forcë Ndërkombëtare Stabilizimi në Gaza, e mandatuar deri në fund të vitit 2027. Numri i trupave pritet të arrijë në rreth 8,000, ku do të përfshihen edhe Shqipëria, Kosova dhe Greqia.
Misioni përfshin:
- garantimin e sigurisë në zonat kufitare,
- mbrojtjen e civilëve,
- mbështetjen dhe trajnimin e forcave palestineze,
- sigurimin e korridoreve humanitare,
- çmilitarizimin e Gazës.
Reagime dhe mungesa të rëndësishme
Disa liderë europianë kanë refuzuar ftesën për t’u bashkuar Bordit, përfshirë presidenten e Komisionit Europian, Ursula von der Leyen. Gjithashtu, Mbretëria e Bashkuar, Gjermania dhe Franca nuk do të marrin pjesë, ndërsa Italia do të jetë e pranishme si vëzhguese.
Trump e ka cilësuar Bordin si “organin ndërkombëtar më me ndikim në histori”, ndërsa statuti i tij parashikon që ai të mbetet kryetar edhe pas përfundimit të mandatit presidencial, me të drejtë vetoje mbi shumicën e vendimeve.
Marrëveshja për aderimin e Shqipërisë u ratifikua në Kuvend më 22 janar me 110 vota pro, duke bashkuar votat e mazhorancës dhe opozitës.
