Armëpushimi i shpallur për festën e Pashkëve mes Ukrainë dhe Rusi ka rezultuar i brishtë dhe jetëshkurtër, pasi të dyja palët kanë akuzuar njëra-tjetrën për shkelje të marrëveshjes.
Shtabi i Përgjithshëm i Ushtrisë Ukrainase bëri të ditur se deri në orët e para të mëngjesit janë regjistruar rreth 2,299 shkelje, shumica e të cilave lidhen me sulme me dronë. Megjithatë, sipas Kievit, gjatë kësaj periudhe nuk janë raportuar sulme me raketa apo bomba ajrore të drejtuara.
Nga ana tjetër, Rusi ka bërë pretendime të ngjashme, duke akuzuar Ukrainën për më shumë se 1,900 shkelje të armëpushimit në të njëjtën periudhë kohore, sipas të dhënave të publikuara nga Ministria ruse e Mbrojtjes.
Armëpushimi ishte propozuar nga presidenti rus Vladimir Putin dhe ishte pranuar nga homologu i tij ukrainas Volodymyr Zelensky, me qëllim uljen e përkohshme të tensioneve gjatë festës së Pashkëve.
Sipas marrëveshjes, ndalimi i luftimeve duhej të zgjaste 32 orë, duke nisur nga e shtuna në orën 16:00 sipas kohës së Moskës. Megjithatë, zhvillimet në terren tregojnë se marrëveshja nuk është respektuar plotësisht nga asnjëra palë.
Situata mbetet e tensionuar, ndërsa mungesa e besimit dhe përplasjet e vazhdueshme e bëjnë të pasigurt çdo përpjekje për armëpushime afatgjata në konfliktin mes dy vendeve.
