Presidenti i Shtetet e Bashkuara të Amerikës, Donald Trump, ka vendosur të shtyjë vizitën e planifikuar në Kinë, për shkak të zhvillimeve të fundit që lidhen me përshkallëzimin e situatës në Iran.
Duke folur nga Zyra Ovale, Trump njoftoi se udhëtimi nuk është anuluar, por vetëm është shtyrë për një periudhë prej pesë deri në gjashtë javësh. Ai theksoi se marrëdhëniet me Kinën mbeten pozitive dhe se pala kineze nuk ka shprehur kundërshtime për këtë ndryshim në axhendë.
“Kemi marrëdhënie shumë të mira pune me Kinën. Do të shkojmë atje brenda pesë deri në gjashtë javësh,” u shpreh Trump.
Vizita pritet të përfshijë një takim të rëndësishëm me presidentin kinez Xi Jinping, ku në fokus do të jenë çështje kyçe të marrëdhënieve dypalëshe dhe situata globale.
Shtyrja vjen në një moment të ndjeshëm për diplomacinë ndërkombëtare dhe ekonominë globale, ndërsa tensionet në Lindjen e Mesme kanë ndikuar në rritjen e çmimeve të naftës dhe kanë shtuar pasiguritë për sigurinë e transportit në zona strategjike si Ngushtica e Hormuzit.
Gjithashtu, kjo vonesë mund të ndikojë edhe në ritmin e negociatave mes Uashingtonit dhe Pekinit për çështje të rëndësishme si tarifat tregtare, situata në Tajvan, eksportet e teknologjisë së avancuar dhe burimet strategjike.
Vizita ishte parashikuar fillimisht për në fund të muajit mars, por nuk ishte konfirmuar zyrtarisht nga pala kineze.
