Detaje të reja kanë dalë në dritë lidhur me tragjedinë e ndodhur në malet Vardousia, në zonën e Fokidës në Greqi, ku katër alpinistë u gjetën pa shenja jete pas dy ditësh kërkimesh intensive.
Sipas autoriteteve dhe ekipeve të shpëtimit, katër burrat u gjetën të varrosur nën një ortek, në një zonë pak para majës së malit Korakas. Terreni ku ndodhi ngjarja konsiderohet veçanërisht i rrezikshëm, për shkak të kalimeve të pjerrëta, shpateve vertikale dhe paqëndrueshmërisë së borës.
Ekspertë të alpinizmit theksojnë se në kushte të tilla edhe një zhurmë e vogël mund të shkaktojë ortek, veçanërisht kur bora është e freskët. Alpinistët dyshohet se u rrëmbyen papritur, pa pasur mundësi reagimi. Ata u gjetën shumë pranë njëri-tjetrit, çka tregon se ngjarja ndodhi brenda pak çastesh.
Që në orët e para të hetimeve, skenari i ortekut ishte kryesori, pasi gjurmët e grupit u ndërprenë papritur. Alpinistët kishin nisur ngjitjen në kushte të mira moti, por situata ndryshoi ndjeshëm për shkak të lartësisë dhe morfologjisë së veçantë të malit. Njëri prej tyre e njihte mirë itinerarin, pasi jetonte prej vitesh në zonë dhe e kishte ndjekur shpesh këtë rrugë.
Operacioni për nxjerrjen dhe transportimin e trupave vijon me kujdes të shtuar, për shkak të aksesit të vështirë dhe kushteve të paqëndrueshme atmosferike. Tre nga alpinistët ishin nisur të enjten në mëngjes nga fshati Athanasios Diakos, ndërsa automjeti i tyre u gjet i parkuar në pikën ku fillon ngjitja drejt majës.
Një mik i grupit deklaroi se alpinistët ishin me përvojë dhe se strehimoret e zonës ishin kontrolluar, por rezultuan të mbyllura dhe bosh. Autoritetet u njoftuan menjëherë dhe nisën operacionin e kërkimit, i cili u vështirësua nga temperaturat e ulëta, dukshmëria e kufizuar dhe kushtet ekstreme të terrenit.
Hetimet për rrethanat e sakta të ngjarjes vijojnë, ndërsa komuniteti lokal mbetet i tronditur nga humbja e katër alpinistëve.
