Një ngjarje tronditëse ka goditur qytetin Corleone në provincën e Palermos, ku një nënë 78-vjeçare vrau vajzën e saj me aftësi të kufizuara dhe më pas kreu vetëvrasje. Drama ka tronditur komunitetin lokal, i cili njeh prej vitesh familjen e prekur.
Sipas mediave italiane, Lucia Pecoraro, 78 vjeçe, mbyti vajzën e saj Giuseppina Milone, 47 vjeçe, e sëmurë dhe me aftësi të kufizuara, para se të vetëvarej në pjesën e sipërme të banesës. Karabinierët dhe ekipet e emergjencës 118 mbërritën menjëherë në vendngjarje, por të dyja gratë u gjetën pa shenja jete.
Trupi i Giuseppinës u gjet i mbytur me litar në katin e poshtëm të shtëpisë, ndërsa nëna e saj ishte varur tek kangjellat lart, duke konfirmuar skenën e tragjedisë familjare.
Sipas banorëve të zonës, Lucia Pecoraro kishte rënë në depresion të rëndë pas vdekjes së bashkëshortit të saj, një ish-infermier i spitalit “Bianchi”, i cili ndërroi jetë tetë muaj më parë. Pas humbjes, ajo mbeti e vetme duke u kujdesur për vajzën, e cila kohët e fundit kishte humbur aftësinë për të ecur, duke e rënduar edhe më shumë gjendjen e nënës.
Të afërm të familjes, të shqetësuar për situatën, kishin kontaktuar shërbimet sociale lokale, por pavarësisht kësaj, tragjedia nuk u shmang.
Nëna dhe vajza ishin pjesë aktive e komunitetit fetar të zonës dhe madje kishin udhëtuar së fundmi drejt Pompeit me një grup besimtarësh.
Kryebashkiaku i Corleones, Walter Rà, shprehu dhimbjen e tij për ngjarjen:
“Jemi të shokuar nga kjo tragjedi. I gjithë komuniteti ynë është i prekur thellë. Familja ishte shumë e respektuar, njerëz të mirë që njiheshin nga e gjithë zona.”
Autoritetet italiane po vijojnë hetimet për të rindërtuar deri në detaj dinamikën e ngjarjes dhe për të kuptuar nëse ishin dhënë sinjale paraprake që mund të kishin shmangur këtë fund tragjik.
