Shtetet e Bashkuara kanë paralajmëruar civilët iranianë që të shmangin portet përgjatë Ngushticës së Hormuzit, duke theksuar se zona mund të kthehet në objektiv ushtarak për shkak të aktiviteteve të marinës iraniane.
Komanda Qendrore e SHBA-së (CENTCOM) deklaroi se marina iraniane ka pozicionuar anije brenda porteve civile në këtë zonë strategjike dhe se këto objekte mund të konsiderohen objektiva legjitime nëse përdoren për operacione ushtarake.
Sipas deklaratës, Irani po përdor portet civile për të kryer operacione që, sipas Uashingtonit, përbëjnë kërcënim për transportin ndërkombëtar detar.
“Ky veprim i rrezikshëm rrezikon jetën e njerëzve të pafajshëm. Portet civile të përdorura për qëllime ushtarake humbasin statusin e mbrojtjes dhe bëhen objektiva legjitime ushtarake sipas ligjit ndërkombëtar”, thuhet në reagimin e komandës amerikane.
Autoritetet amerikane u bënë thirrje civilëve iranianë që të shmangin menjëherë objektet portuale ku operojnë forcat detare iraniane, përfshirë punonjësit e porteve, personelin administrativ dhe ekuipazhet e anijeve tregtare.
Ndërkohë, ushtria amerikane theksoi se nuk mund të garantojë sigurinë e civilëve në zonat ku zhvillohen operacione ushtarake, por shtoi se do të marrë masa për të minimizuar dëmet.
Sipas CENTCOM, forcat amerikane kanë goditur gjithashtu 16 anije iraniane që dyshohet se po vendosnin mina pranë Ngushticës së Hormuzit, një nga rrugët më të rëndësishme detare për transportin e energjisë në botë.
