Seanca plenare është përfshirë nga debate të ashpra pas bllokimit të foltores nga deputetët e Partisë Demokratike, në shenjë proteste për ndërprerjen e fjalës së Sali Berishës nga kryetari i Kuvendit, Niko Peleshi.
Në fjalën e tij, kreu i grupit parlamentar të PS, Taulant Balla, i bëri thirrje opozitës që të distancohet nga aktet e dhunës në protestat e fundit, duke theksuar se çdo parti mban përgjegjësi për organizimin dhe mbarëvajtjen e tubimeve që thërret.
“I bëj thirrje PD të distancohet nga dhuna e përsëritur nga protestat e thirrura nga kjo parti. Çdo parti mban përgjegjësi për mbarëvajtjen e këtyre protestave. Ka të dyshuar të paguar për të kryer këto akte tensioni,” u shpreh Balla.
Ai kërkoi gjithashtu që Kuvendi të dalë me një qëndrim në mbrojtje të punonjësve të Policisë së Shtetit dhe t’i kërkojë Prokurorisë masa shtesë për garantimin e paprekshmërisë së uniformës.
Gjatë debatit, Balla pati edhe një përplasje verbale me një deputete të opozitës, duke iu drejtuar me fjalët: “Pusho moj ti pusho, se le nam”, çka shtoi më tej tensionin në sallë.
Seanca vijon mes akuzash dhe kundërakuzash mes mazhorancës dhe opozitës.
