Mbledhja e Komisionit Parlamentar për Kulturën, Turizmin dhe Diasporën u shoqërua me debate mes deputetëve të opozitës dhe mazhorancës lidhur me ndryshimet ligjore për zonat e mbrojtura.
Kryetarja e komisionit, deputetja e Partisë Demokratike Ina Zhupa, akuzoi mazhorancën se ka ndërmarrë, sipas saj, “korrupsion legjislativ”, duke pretenduar se ndryshimet në legjislacion janë bërë për t’iu përshtatur projekteve të zhvillimit të përfshira në atë që ajo e quan “The Albanian Files” ose “Dosja Shqiptare”.
Sipas Zhupës, pa këto ndryshime ligjore, një numër i madh projektesh nuk do të mund të realizoheshin. Ajo deklaroi se ligjet janë hartuar për t’u shërbyer interesave të caktuara dhe kritikoi politikat e qeverisë në lidhje me zhvillimet në zonat e mbrojtura.
Deklaratat e saj u kundërshtuan nga deputetët e Partisë Socialiste, të cilët kërkuan që diskutimi të fokusohej te rendi i ditës. Gjatë debatit, deputeti socialist Bujar Rexha u largua nga salla.
Më pas, Zhupa iu referua edhe protestave të zhvilluara në Tiranë, duke deklaruar se ato shprehin pakënaqësi qytetare ndaj qeverisë. Ajo paraqiti tre propozime, mes të cilave zhvillimin e vizitave monitoruese në zonat e trashëgimisë natyrore për të vlerësuar gjendjen e tyre.
Sekretari i komisionit, Arkend Balla, kundërshtoi hedhjen në votim të propozimeve, çka solli një tjetër përplasje verbale mes palëve.
Deri në këtë moment nuk ka pasur një reagim zyrtar nga mazhoranca lidhur me akuzat e ngritura nga deputetja Ina Zhupa gjatë mbledhjes së komisionit.
