Marrëdhëniet mes Rusia dhe Armenia kanë hyrë në një fazë të re tensioni, pasi Moska ka njoftuar tërheqjen për konsultime të ambasadorit të saj në Jerevan, në një sinjal të qartë pakënaqësie ndaj afrimit të qeverisë armene me Bashkimin Europian.
Sipas Ministrisë së Jashtme ruse, ambasadori Sergei Kopyrkin është thirrur në Moskë për konsultime lidhur me hapat që autoritetet armene po ndërmarrin drejt integrimit dhe bashkëpunimit më të ngushtë me Bashkimin Europian.
Vendimi vjen vetëm një ditë pasi presidenti rus Vladimir Putin paralajmëroi Jerevanin për pasojat që mund të sjellë largimi nga orbita politike dhe ekonomike e Rusisë.
Në ditët e fundit, Moska ka shtuar presionin ndaj Armenisë, ndërsa edhe Unioni Ekonomik Euroaziatik ka paralajmëruar se mund të shqyrtojë pezullimin e pjesëmarrjes së Armenisë në organizatë nëse vendi vijon rrugën drejt anëtarësimit në Bashkimin Europian.
Paralelisht, autoritetet ruse kanë lënë të kuptohet se mund të rishikojnë marrëveshjet preferenciale për furnizimin me gaz natyror dhe naftë, duke goditur një nga sektorët më të ndjeshëm të ekonomisë armene.
Nga ana tjetër, qeveria e kryeministrit Nikol Pashinyan ka forcuar vitet e fundit marrëdhëniet me Perëndimin dhe Bashkimin Europian, një kurs që ka shkaktuar irritim të vazhdueshëm në Kremlin.
Zhvillimet vijnë në prag të zgjedhjeve parlamentare të 7 qershorit në Armeni, ku partia e Pashinyanit konsiderohet favorite për të siguruar një tjetër mandat qeverisës. Situata po shihet nga analistët si një përballje e hapur mes ndikimit tradicional rus në Kaukazin Jugor dhe përpjekjeve të Armenisë për t’u afruar me strukturat euroatlantike.
