Kreu i grupit parlamentar të Partia Socialiste, Taulant Balla, ka përfunduar dëshminë e tij në GJKKO në kuadër të gjyqit ndaj Sali Berisha për dosjen “Partizani”.
Balla, i cili është edhe kallëzuesi i çështjes, deklaroi pas daljes nga seanca se i qëndron plotësisht kallëzimit të tij dhe shprehu besim se drejtësia do të japë vendimin e duhur. “Drejtësia vonon, por nuk harron,” u shpreh ai para mediave.
Ai theksoi se kallëzimin e ka bërë në emrin e tij dhe se do ta mbrojë deri në fund, duke shtuar se procesi duhet të jetë i drejtë dhe përgjegjësia penale të shkojë tek kushdo që e ka.
Gjatë prononcimit, Balla solli në vëmendje edhe një tjetër çështje të rëndësishme, duke shprehur dëshirën që të thirret si dëshmitar edhe për ngjarjet e 21 Janari. Ai u shpreh se ka qenë i pranishëm në atë protestë dhe është i gatshëm të japë dëshminë e tij.
“Shpresoj që në ditët në vijim të jem këtu edhe për 21 Janarin,” deklaroi Balla.
Ndërkohë, procesi gjyqësor për dosjen “Partizani” vijon në GJKKO, ku priten edhe dëshmi të tjera. Më herët, gjykata ka pranuar kërkesën për thirrjen si dëshmitar edhe të kryeministrit Edi Rama, ndërsa ka rrëzuar kërkesa të tjera që janë konsideruar pa relevancë për çështjen.
Dosja “Partizani”, e përbërë nga qindra fashikuj, konsiderohet një nga proceset më të rëndësishme në drejtësinë shqiptare, me fokus pretendimet për abuzime me prona dhe procedura privatizimi.
