Eksperti i kriminalistikës, Ervin Karamuço, ka folur për masat e sigurisë dhe hapat paraprakë që do të shoqërojnë zgjedhjet e vitit 2025. Ai theksoi se përveç prokurorëve të shpërndarë në qytete të ndryshme të Shqipërisë, do të angazhohen edhe agjentë hetues të BKH-së dhe oficerë policie për të zbuluar dhe parandaluar krimin zgjedhor.
Sipas Karamuços, teknikat e ndjekura nga SPAK janë shumë më të sofistikuara dhe nuk kanë nevojë për metoda tradicionale të survejimit, si furgonët e dukshëm në terren. Ai theksoi se gjatë fushatës zgjedhore, aktiviteti hetimor do të jetë në kulmin e tij, me prokurorë të shpërndarë në qytete të ndryshme, si Vlora dhe Lezha, si dhe me një bashkëpunim të ngushtë mes BKH-së dhe policisë.
Karamuço shtoi se agjentët dhe oficerët do të trajnohen nga OSBE për të identifikuar dhe ndjekur rastet e krimeve zgjedhore, përmes një programi specifik dhe intensiv. Ai parashikon që ky grup do të ketë një rol aktiv në mbikëqyrjen e procesit dhe se shumë shkelës të ligjit do të bien në grackë, duke qenë se nuk janë mësuar me një kontroll të tillë rigoroz.
