SPAK ka hyrë në fazën përfundimtare të hetimeve për Protesta e 21 janarit 2011, një nga çështjet më të ndjeshme dhe të zvarritura të drejtësisë shqiptare.
Kreu i SPAK, Klodjan Braho, ka paralajmëruar se shumë shpejt do të dalin përgjegjësit për vrasjen e katër protestuesve në bulevard, duke sinjalizuar një përparim të rëndësishëm pas më shumë se një dekade hetimesh.
Nga ana tjetër, familjarët e viktimave shprehen skeptikë për ritmin e procesit. Mark Nika theksoi se çështja është zvarritur për 15 vite dhe se ende nuk janë marrë në pyetje të gjithë personat që mund të kenë dijeni për ngjarjen.
Në reagimin e tij, avokati i familjarëve, Idajet Beqiri, ka ngritur akuza të forta, duke deklaruar se përgjegjësia kryesore bie mbi ish-kryeministrin Sali Berisha, i cili sipas tij rrezikon dënim maksimal nëse provohet fajësia.
Beqiri ka kërkuar gjithashtu që në kuadër të hetimeve të thirret si dëshmitare kyçe edhe Ina Rama, duke pretenduar se ajo ka pasur rol të rëndësishëm në trajtimin e provave pas ngjarjes.
Ai ka ngritur akuza edhe për zhdukjen e provave, duke përmendur serverët e institucioneve shtetërore, një pjesë e të cilëve sipas tij janë rikuperuar, ndërsa të tjerë mbeten të humbur.
Çështja e “21 Janarit” mbetet një plagë e hapur në historinë politike dhe juridike të vendit, ndërsa pritshmëritë janë që hetimet e SPAK të sjellin më në fund përgjegjësi konkrete.
Sqarim: Çdo person prezumohet i pafajshëm derisa fajësia e tij të provohet me një vendim gjyqësor të formës së prerë.
