Ndërsa jemi në kulmin e sezonit të pushimeve dhe në prag të shtatorit, muajit kur pritet të konstituohet Parlamenti i ri, dalë nga zgjedhjet e 11 majit 2025, gazetari Ardit Hoxha ka bërë një analizë mbi situatën e opozitës dhe aksionin politik që do të nisë në sezonin e ri.
Hoxha nënvizon se në Partinë Demokratike po shqyrtohet mundësia e hartimit të një platforme të re, që synon përfshirjen e elementëve nga diaspora në radhët e PD-së. Ai shpjegon se Sali Berisha ka lënë të kuptohet se ky proces reformimi mund të nisë prej shtatorit dhe të përfundojë pranë pranverës së vitit të ardhshëm.
“Sipas burimeve të brendshme, shumica e zërave në PD janë në dakordësi se situata aktuale nuk mund të vazhdojë kështu. Nevojitet një proces i thellë pastrimi të brendshëm, reflektimi dhe rigjenerimi të figurave dhe brezave, me synimin që në zgjedhjet vendore të vitit 2027 të ketë një ngritje të fortë dhe më pas një fitore në zgjedhjet e përgjithshme të 2029.” – tha Hoxha.
