Apeli i Gjykata e Posaçme kundër Korrupsionit dhe Krimit të Organizuar (GJKKO) ka shtyrë vendimin lidhur me afatet e paraburgimit për kryebashkiakun e Tiranës, Erion Veliaj.
Pas përfundimit të seancës, avokati i tij, Ndreca, deklaroi për mediat se shtyrja erdhi për shkak të një parregullsie në procedurë, duke mos dhënë detaje të plota mbi natyrën e saj.
Sipas tij, është krijuar një praktikë problematike ku mungesa e një avokati të një bashkëpandehuri çon në shtyrjen e të gjithë procesit, duke e cilësuar këtë si një lloj “dënimi kolektiv”.
Ndreca theksoi gjithashtu se nuk ka arsye ligjore për pezullimin e afateve të paraburgimit, për sa kohë që palët nuk paraqesin shkaqe të justifikuara për shtyrjen e seancave.
Për momentin, nuk ka një datë të re të konfirmuar për vijimin e procesit, ndërsa çështja mbetet në shqyrtim nga gjykata.
