Policia e Elbasanit, në bashkëpunim me Prokurorinë e Rrethit, ka finalizuar operacionin e koduar “The Script 2”, duke goditur një skemë të dyshuar të fshehjes së të ardhurave nga subjekte të këmbimit valutor. Tre administratorë të pikave të këmbimit, R. K. (62 vjeç), B. L. (63 vjeç) dhe A. N. (58 vjeç), janë proceduar penalisht pasi akuzohen se nuk deklaronin të gjitha fitimet e përfituara nga veprimtaria e tyre financiare.
Gjatë kontrolleve të ushtruara në ambientet e tre pikave të ndryshme në qytetin e Elbasanit, hetuesit sekuestruan shuma të konsiderueshme parash në valuta të ndryshme, me vlerë totale prej 6.152.430 lekësh. Paratë përfshinin monedha kombëtare dhe të huaja si lekë, euro, dollarë amerikanë, franga zvicerane dhe paund britanik. Sipas burimeve nga grupi hetimor, këto shuma dyshohet se janë të ardhura të padeklaruara nga aktiviteti i këmbimit valutor, të cilat janë mbajtur jashtë skemës ligjore të deklarimit dhe tatimit.
Operacioni është zhvilluar pas një hetimi disa mujor, ku janë përdorur teknika speciale të hetimit financiar dhe është bashkëpunuar me institucione të tjera të specializuara në fushën e parandalimit të pastrimit të parave. Policia thekson se veprime të tilla jo vetëm që dëmtojnë buxhetin e shtetit, por edhe krijojnë hapësirë për aktivitete të tjera kriminale.
Materialet procedurale janë dorëzuar pranë Prokurorisë së Gjykatës së Shkallës së Parë Elbasan për veprime të mëtejshme, ndërsa hetimet vazhdojnë për të zbuluar nëse në këtë skemë janë të përfshirë edhe persona të tjerë apo rrjete të organizuara financiare.
