Trekëndëshi i Bermudës ka qenë për dekada sinonim i misterit, i zhdukjeve të pashpjeguara dhe teorive fantastike. Por këtë herë, misteri nuk ndodhet në qiell apo në sipërfaqen e detit, por thellë nën tokë, aty ku shkenca sapo ka zbuluar diçka që sfidon njohuritë aktuale për strukturën e planetit.
Një grup studiuesish ndërkombëtarë ka zbuluar një anomali gjeologjike të paprecedentë poshtë arkipelagut të Bermudës, një formacion shkëmbor që nuk i ngjan asnjë strukture tjetër të njohur në Tokë.
Çfarë u zbulua nën Bermudë?
Sipas studimit, nën koren oqeanike të Bermudës ndodhet një shtresë shkëmbore rreth 20 kilometra e trashë, një dukuri jashtë çdo modeli standard gjeologjik. Normalisht, pas kores oqeanike vjen drejtpërdrejt manteli i Tokës, por në këtë zonë ndodh diçka krejt ndryshe.
Gjeologu William Fraser nga Carnegie Science (Washington), në një deklaratë për Live Science, shpjegon:
“Zakonisht, manteli gjendet menjëherë nën koren oqeanike. Në rastin e Bermudës, kemi një shtresë shtesë shkëmbore, e vendosur brenda vetë pllakës tektonike. Kjo është jashtëzakonisht e pazakontë.”
Një mister që lidhet me lindjen e vetë Bermudës
Origjina e kësaj shtrese mbetet ende e panjohur, por shkencëtarët dyshojnë se ajo lidhet drejtpërdrejt me formimin e Bermudës.
Arkipelagu ndodhet mbi një ngritje oqeanike dhe mendohet se është formuar nga aktivitet vullkanik i lashtë. Shpërthimi i fundit i njohur në këtë zonë ka ndodhur rreth 31 milionë vite më parë, dhe një nga teoritë kryesore është se ky aktivitet ka ngritur fundin e oqeanit, duke krijuar strukturën anormale që po zbulohet sot.
Pse ky zbulim është kaq i rëndësishëm?
Sipas studiuesve, raste të tilla “ekstreme” janë kyçe për të kuptuar funksionimin e brendshëm të planetit.
“Duke studiuar një vend kaq të pazakontë si Bermudat, ne kuptojmë më mirë edhe pjesët ‘normale’ të Tokës. Kjo na ndihmon të dallojmë proceset e zakonshme nga ato vërtet ekstreme”, shpjegon Fraser.
Oqeanet ende fshehin sekretet më të mëdha të Tokës
Zbulimi nën Bermudë i shtohet një serie zbulimesh të fundit që tregojnë se thellësitë e oqeaneve janë ende territor i panjohur. Vetëm pak kohë më parë, shkencëtarët konfirmuan ekzistencën e Zealandia-s, një kontinent i “humbur” mbi një miliard vjeçar, pjesa më e madhe e të cilit ndodhet nën ujë.
Tani, Bermudat nuk janë më thjesht një mit detar – por një nga enigmat më të mëdha gjeologjike të planetit, që dëshmon se Toka vazhdon të na surprizojë… thellë nën sipërfaqe
