Seanca e radhës në GJKKO për kryebashkiakun e Tiranës, Erion Veliaj, dhe 29 të pandehur të tjerë është shtyrë për në datën 27 prill, mes debateve procedurale në sallën e gjyqit.
Në mungesë të Veliajt, avokati i tij mbrojtës, Plarent Ndreca, kërkoi që gjykimi të mos vijojë, duke argumentuar se nuk janë respektuar të drejtat themelore procedurale të klientit të tij. Ai theksoi se Veliaj nuk ka shprehur vullnet për pjesëmarrje apo mungesë në seancë, çka sipas tij e bën të pamundur vijimin normal të procesit.
Ndreca ngriti gjithashtu shqetësime lidhur me aksesin në dosjen hetimore, duke kundërshtuar kufizimin e materialeve të vëna në dispozicion. Sipas tij, mbrojtja duhet të ketë akses në të gjithë fashikujt e çështjes dhe jo vetëm në një pjesë të tyre.
Ndërkohë, u bë e ditur se Drejtoria e Burgjeve nuk ka zbatuar urdhrin e gjykatës për shoqërimin e Veliajt dhe nuk ka paraqitur një deklaratë zyrtare për mungesën e tij. Gjithashtu, sipas raportimeve, vetë Veliaj nuk ka dhënë asnjë shpjegim për mosparaqitjen në seancë.
Zhvillimet e sotme kanë sjellë shtyrjen e procesit, ndërsa pritet që në seancën e ardhshme të sqarohen çështjet procedurale dhe të vijojë shqyrtimi i dosjes.
