Ish-deputeti demokrat Ervin Salianji ka vijuar turin e takimeve me strukturat dhe mbështetësit e Partisë Demokratike në Berat, ku ka përcjellë një mesazh të fortë për nevojën e reformimit të thellë të partisë.
Salianji theksoi se demokratët prej 13 vitesh po përballen me humbje të njëpasnjëshme dhe se, sipas tij, lidershipi nuk ka mbajtur përgjegjësi për rezultatet elektorale. Ai u shpreh se historia e PD-së meriton respekt, por se vetëm ndryshimi mund të garantojë të ardhmen dhe rikthimin në pushtet.
Sipas tij, Partia Demokratike duhet të hapet ndaj të rinjve, ideve të reja dhe konkurrencës së brendshme, duke shmangur përjashtimet dhe mbylljen e strukturave. Salianji kritikoi mënyrën e përzgjedhjes së kandidatëve dhe proceset e brendshme, të cilat, sipas tij, po e mbajnë partinë të izoluar dhe jo konkurruese.
Ai nënvizoi se rrëzimi i mazhorancës aktuale është i mundur vetëm përmes bashkimit të opozitës, organizimit të brendshëm dhe rikthimit të besimit te qytetarët. “PD duhet të rigjallërohet, jo të shkatërrohet nga brenda”, u shpreh ai, duke shtuar se ndryshimi nuk është luks, por domosdoshmëri.
Në përfundim, Salianji apeloi për reflektim dhe përgjegjësi politike, duke theksuar se vetëm një Parti Demokratike e bashkuar, e hapur dhe e reformuar mund të jetë alternativë fituese për qeverisjen e vendit.
