Kreu i Partia Demokratike e Shqipërisë, Sali Berisha, ka mbajtur një qëndrim të ashpër ndaj atyre që i cilësoi si “tradhtarë” brenda radhëve të partisë, duke paralajmëruar përjashtim për këdo që bashkëpunon me kundërshtarët politikë.
Gjatë një mbledhjeje me drejtues dhe koordinatorë politikë, Berisha u ndal te individë që, sipas tij, kanë mbështetur kandidatë të tjerë apo kanë votuar në favor të maxhorancës. Ai theksoi se persona të tillë nuk mund të jenë pjesë e Partisë Demokratike.
“Mos të mendojë askush se duke i shërbyer socialistëve do të jetë pjesë e jona. Ka njerëz që shiten dhe bëjnë pazare, por demokratët janë më të fortë,” deklaroi ai.
Në fjalën e tij, Berisha bëri thirrje për bashkim dhe rritje të anëtarësimeve, duke theksuar se opozita ndodhet në një fazë vendimtare të betejës së saj politike. Ai kërkoi gjithashtu kontroll më të fortë të strukturave dhe pajisjen e anëtarësisë me dokumentacion përkatës.
Një tjetër theks i rëndësishëm i deklaratës ishte apeli për intensifikimin e protestave, të cilat ai i cilësoi si mjetin kryesor për t’u dëgjuar nga qytetarët dhe ndërkombëtarët.
“Ne kemi vetëm një rrugë: protestën dhe revoltën,” u shpreh Berisha, duke akuzuar kryeministrin Edi Rama për vendime që, sipas tij, kanë dëmtuar interesat e qytetarëve.
Ai ngriti gjithashtu shqetësimin për perceptimin e korrupsionit në vend, duke e lidhur këtë me çështje konkrete politike, si mosheqja e imunitetit për Belinda Balluku, të cilën e konsideroi shembull të mungesës së llogaridhënies.
Në përfundim, Berisha theksoi se Partia Demokratike do të vijojë betejën e saj politike pa u ndalur, duke paralajmëruar se çdo bashkëpunim me maxhorancën do të ketë pasoja brenda partisë.
