Deputeti i Partia Demokratike e Shqipërisë, Saimir Korreshi, ka reaguar publikisht ndaj akuzave dhe debatit të fundit lidhur me regjistrimin e pronave në Kolonjë.
Përmes një deklarate me tone ironike, Korreshi publikoi një listë pronash të Bashkisë Kolonjë, duke theksuar se dokumentacioni daton që në vitin 2010, periudhë kur, sipas tij, ai nuk mbante funksione publike.
“Shihe datën, 7.1.2010. Nuk kam qenë në punë atëherë, por regjistrimet kanë vijuar”, deklaroi ai.
Deputeti demokrat iu përgjigj kritikëve që, sipas tij, pretendojnë se nuk ekzistojnë prona të regjistruara në Kolonjë, duke publikuar dokumente që i cilësoi si prova të titujve të pronësisë.
Në reagimin e tij, Korreshi përdori edhe batuta politike ndaj kundërshtarëve, duke i akuzuar se ndërsa qytetarët e zakonshëm përpiqeshin të regjistronin pronat e tyre, të tjerë merreshin me regjistrime pronash në zona bregdetare si Palasë.
Deklarata e deputetit vjen në kuadër të debateve politike mbi çështjet e pronësisë dhe regjistrimit të pasurive në disa bashki të vendit.
