Shtetet e Bashkuara të Amerikës po rrisin praninë e tyre ushtarake në Lindjen e Mesme, duke shtuar pasiguritë për një përshkallëzim të mundshëm të konfliktit me Iranin. Sipas raportimit të The Guardian, vendosja e forcave të reja në rajon po ushqen spekulimet se Uashingtoni mund të jetë duke përgatitur terrenin për një ndërhyrje më të thellë ushtarake.
Rreth 2,500 marinsa dhe marinarë amerikanë kanë mbërritur tashmë në zonë, ndërsa zhvillimet vijnë në një moment kur administrata e Donald Trump vazhdon të deklarojë se diplomacia mbetet prioritet për t’i dhënë fund luftës me Iran.
Sipas Komandës Qendrore të SHBA-së (CENTCOM), këto trupa janë dislokuar në bordin e anijes amfibe USS Tripoli (LHA-7), e cila mbërriti në rajon më 27 mars. Anija shërben si pjesë e një grupi të gatishmërisë amfibe dhe mbart jo vetëm trupa, por edhe avionë luftarakë, mjete transporti dhe pajisje të avancuara ushtarake.
Kjo lëvizje ka ngritur pyetje të forta nëse SHBA po përgatitet për një skenar ku negociatat dështojnë dhe do të kërkohej një ndërhyrje tokësore për të goditur objektivat iraniane. Megjithatë, deri më tani, Shtëpia e Bardhë nuk ka konfirmuar një plan të tillë, duke theksuar se përpjekjet diplomatike janë ende në vazhdim.
Ekspertët paralajmërojnë se një operacion tokësor ndaj Iranit do të ishte shumë kompleks dhe me pasoja të gjera për rajonin dhe më tej. Në këtë kuadër, dislokimi i trupave mund të shihet si një sinjal presioni ndaj Teheranit, por edhe si një përgatitje për çdo skenar të mundshëm në një situatë gjithnjë e më të tensionuar në Lindjen e Mesme.
