Deputeti i Partisë Demokratike, Ervin Salianji, ka akuzuar qeverinë se po rëndon gjithnjë e më shumë qytetarët përmes taksave të larta, duke u ndalur veçanërisht te çmimi i naftës, të cilin e cilëson si një nga faktorët kryesorë të rritjes së kostos së jetesës.
Në një reagim publik, Salianji shprehet se çmimi i naftës në Shqipëri është rreth 78–80% më i lartë krahasuar me Kosovën, ndërsa thekson se barra fiskale mbi karburantet përbën gati 60% të çmimit final që paguajnë qytetarët.
Sipas tij, akciza, taksa e qarkullimit dhe TVSH-ja e bëjnë naftën në Shqipëri një nga më të shtrenjtat në rajon, duke ndikuar drejtpërdrejt në rritjen e çmimeve të ushqimeve, transportit dhe shërbimeve bazë.
“Ndërsa qeveritë e rajonit ulin taksat për të lehtësuar qytetarët, në Shqipëri taksat vetëm rriten, sepse qeverisë i duhen para për të ushqyer korrupsionin,” deklaron Salianji.
Ai shton se nafta e shtrenjtë nuk prek vetëm drejtuesit e automjeteve, por gjithë zinxhirin ekonomik, duke rritur varfërinë dhe duke ulur fuqinë blerëse të familjeve shqiptare.
Në reagimin e tij, Salianji e cilëson këtë qasje si “model grabitjeje dhe jo qeverisje”, duke bërë thirrje për reagim qytetar dhe protesta kundër politikave fiskale të mazhorancës.
