Në seancën e sotme në Gjykatën Kushtetuese për pezullimin e zëvendëskryeministres Belinda Balluku, përfaqësuesja e Kryeministrisë, Jona Qosja, deklaroi se çështja e paraqitur nga qeveria nuk ka të bëjë me një ankim individual apo me mbrojtjen e një personi të caktuar.
Sipas saj, kërkesa lidhet ekskluzivisht me sqarimin e kompetencave mes pushtetit ekzekutiv dhe atij gjyqësor. Qosja theksoi se Këshilli i Ministrave nuk është palë në një proces penal dhe, për këtë arsye, nuk mund të ndjekë rrugën e zakonshme të ankimit në shkallët e gjyqësorit.
Ajo argumentoi se pyetja thelbësore që kërkon përgjigje është nëse një gjykatë penale ka të drejtë të pezullojë nga detyra një ministër, duke cenuar funksionimin e qeverisë. Sipas qëndrimit të Kryeministrisë, një kompetencë e tillë nuk i takon gjykatës penale.
Përfaqësuesja e qeverisë nënvizoi se pezullimi ka ndikuar drejtpërdrejt në veprimtarinë e ekzekutivit, duke bllokuar vendimmarrjen dhe ushtrimin normal të funksioneve ministrore, ndaj kërkohet ndërhyrja e Gjykatës Kushtetuese për të vendosur kufijtë mes pushteteve.
